بیروڕا
پرسی ئیسرائیل و سوننەکانی عێراق لەهەولێر
ئازاد ئیبراهیم ئەحمەد

کۆبوونەوەی بەشێکی هۆزە عێراقیەکان لە هەولێر کە داوای ئاساییکردنەوەی پەیوەندیەکانی ئیسرائیل و عێراق دەکەن کارێکی ئاسایی نییە، حکومەتی هەرێمیش نەک ئاگای لەم کۆبوونەوە هەیە بەڵکو زۆر باش ڕێگەی داوە ئەو کۆبوونەوەیە ببەسترێت و لەپشتەوەی ئەم کۆبوونەوەیە وڵاتی ئیقلیمیش وجودی هەیە، هەرچی پەیوەستە بەهەولێریشەوە پەیامی دوای ئەنجامەکانی هەڵبژاردنی پێیە و ڕوون و ڕەوان هەم هەولێر و هەم وڵاتانی ئیقلیمیش دەیانەوێت لەڕێگەی ئەو سەرۆک هۆزانەوە کە سوننەن ئەو پەیامە بگەیەنن کە دوای کشانەوەی هێزە شەڕکەرەکانی ئەمریکا؛ عێراق تەنها بۆ شیعەکان جێنامێنێت، بەڵکو دەبێتە عێراقی سوننە و سوننەش دەتوانێت بڕیار لەسەر پەیوەندییەکانی عێراق بدات لەگەڵ هەر وڵاتێک وەک چۆن ئێران گوتاری شیعە ئاراستە دەکات دژی ئیسرائیل.

لەساڵانی ڕابردووشدا 25 حزبی سوننی عێراقی و سەرکردەی سوننی عێراقی لەهەولێر کۆبوونەوە، وا ڕاگەیەنرا کە کۆبوونەوەکە ئاسایی بووەو هیچ مەترسییەکی نییە بەڵام پاشان دەرکەوت ئەم کۆبوونەوەیە بەچاودێری وڵاتێکی ئیقلیمی بووە و مەبەست لەکۆبوونەوەکەش بۆ دروستکردنی ناوچەیەکی سوننی بەهێز بووە لەپاڵ هێڵی شیعی ناوچەکەدا "هیلالی شیعی"، ئێستاش کە سەرۆکی هۆزە سوننییەکانی عێراق لەهەولێر کۆدەبنەوە هەڵگری پەیامێکە بۆ شیعەکان کە چوونەدەرەوەی نەیارێکی وەک ئەمریکا بەس نییە و زنگی هاتنی نەیارێکی دیکەی وەک ئیسرائیل بۆ شیعەی ناوچەکە لێدەدرێت، ئیسرائیلیش لەدوای هەنگاوێکی لەم شێوەیە دەگەڕێت و دوای کرانەوەی لەگەڵ چەند دەوڵەتێکی کەنداو پێشوازی لەهەر جۆرە کرانەوەکیش لەگەڵ عێراق دەکات.

لەناوخۆی عێراقدا، سوننەکانی عێراق جگە لە هەولێر هیچ شوێنێکی دیکەیان نییە هێندە بەئاسانی تێیدا کۆببنەوە و دوای هەڵهاتنیان لەعێراق لێی دابنیشن و پشوویەکی لێ بدەن، تەنانەت ئەوان "سلێمانی"ش هەڵنابژێرن بۆ کۆبوونەوەیەکی لەم جۆرە، چونکە ئەوان هەم هەولێر بەجێگای ڕازونیازەکانیان دەزانن هەم لەهەولێرەوە دەتوانن باشتر کۆنتاکتی ئەو ویستە ئیقلیمییە بکە کە دەیەوێت دنەی سوننەکان بدات بۆ بەهێزبوونەوە، ئێستا سوننەکانی عێراق ئامادەن لەگەڵ تەواوی ئەو لایەن و ڕێکخراوە ناوخۆیی و دەوڵەتە ئیقلیمی و جیهانیانە دابنیشن کە شیعەی عێراقی و دەرەوەی عێراقیش بەمەترسی بۆسەر خۆیانی دەزانن و نایانەوێت هیچ نزیکبوونەوەیەک لەنێوانیاندا هەبێت.

شتێکی بڕوا پێنەکراوە کۆبوونەوەیەکی لەم شێوەیە لەهەولێردا ببەسترێت و دەسەڵاتی سیاسی هەولێر بێئاگایی خۆی لێڕابگەیەنێت!، دواجار جێگای پرسیارە ئەم سەرۆک هۆزانە بۆ هەولێریان هەڵبژارد بۆ کۆبوونەوەکەیان و شارێکی دیکەی عێراقیان هەڵنەبژارد؟ بۆ تەنها شیعە و سەرکردە شیعەکانی وەک سەدر و حەکیم و مالیکی و "کازمی" و عەبادی دژی ئەم کۆبوونەوەیە بوون؟ بۆ پرسی ئیسرائیل وروژێنراوەو قسە لەسەر قەیرانە جیاوازەکانی عێراق نەکراوە؟ هەموو ئەم پرسیارانە و هیتریش، ئاماژەی ڕوونن و ئاسانن بۆ تێگەشتن. بۆ هەرێمی کوردستان نەک ئەم کۆبوونەوەیە مایەی سوود و بەرژەوەندی نییە بەڵکو زیاتر مەترسیی بەدوای خۆیدا دەهێنێت بۆسەر پەیوەندییەکانی هەرێم و ناوەند و پێکهاتەی شیعە.

‌‌ زیاتر ...
ئازاد ئیبراهیم ئەحمەد
ئازاد ئیبراهیم ئەحمەد
ئازاد ئیبراهیم ئەحمەد
ستران عەبدولڵە
ستران عەبدولڵە
ئازاد ئیبراهیم ئەحمەد
زۆرترین خوێندراو
  • 24 کاتژمێر
  • هەفتە
  • مانگ