بیروڕا
یاداشتەكانی حزبییە رۆمانسییەكە
ستران عەبدووڵا

(1)
قەینا ئێمە كوڕە كچەڵەكەی حیكایەتی كوردەواریین، كوڕی پیرێژنە فەقیرەكەی گەڕەكە لاچەپەكەی خانووە قوڕەكانین یان وەك دەگوترێ لە ژنە عەرەبەكەین و هەر ئەوە بەخت و بەشمانە ، بەڵام خۆ ئەمە ئەو شتانە نەبوو كە باوكە دامەزرێنەرەكان بە ئێمەیان گوت. كاتی خۆی شتێكی تریان باس كرد و مانفێستێكی تریان بۆ خوێندینەوە. ئێستا چۆن سەیری دەكەین دەستكاری كراوە، لێی قرتاوە و لێی زیاد كراوە.
(2)
ڕەنگە گاڵتەیان بەوە بێت كە پێداگری لەسەر بەهاكان  و گیانی هەڤاڵبەندی بكەیت . یانی بڵێن ئەمە گوتەی بێدەسەڵاتەكانە كە نفوز و نقودیان نییە.
بەڕاستی  سەرەتا قسە و بیر و باوەڕ هات ئینجا مرۆڤ ئاوەدانی هێنا و دامەزراوەی پێك هێنا. بیریان چۆتەوە خۆی كوردایەتی، نیشتمان  و نەتەوە لە ئەسڵدا بیرۆكە بوون. دوایی رێكخراوەو تۆڕی وجودیان بۆ بیناكرا.
 فیكر ئەسڵە، رێباز و هاوئامانجی ئەسڵە.
(3)
ئەو دیموكرسییە راگوزەرەی لە كوردستان هەیە خوێن و فرمێسكێكی زۆری بۆ ڕژاوە. ئێمە دەڵێین زۆرترین قوربانیمان  بۆ داوە. كەچی دوا كەسانێكین كەڵك لەم دیموكراسییە وەردەگرین. حزب دێ و دەڕوا ، كۆنگرەو میتنگ و كۆنفراسی خۆی دەكا و لەم دیموكراسییە بەهرەمەند دەبێت. كەچی ئێمە وەك پاسەوان و خەفەری دیموكراسیی واین كە بەداخەوە بانگێشتی ئاهەنگەكان ناكرێین.
(4)
زۆر كەس لە تێكۆشەران و چالاكانی سیاسیی حزبەكان خەفەت بۆ تێكۆشانی بێ حاسڵی رابردوو دەخۆن كە ئاكامی خەباتیان لەگەڵ ئەمرۆی خۆشیان ناگونجێ. وایدەبینم دەبێ كێشەكە لەسەر جەردی حیسابی رابردوو نەبێت، بەڵكو لەسەر ماباقی عومر و دەرفەتی تێكۆشان بێت. پێویستە پەرۆشی ئایندە بین كە دوارۆژمان بە فیرۆ نەڕوات و رێرەوەكە ڕاست بكەینەوە.
(5)
نە قرچۆكی جاران لە پێدانی پلە و ناونیشانی هەڤاڵێتی بە جۆرێك كە چەند نەوەی حزبی كەڵەكەبوون لەسەر یەك و تووشی پەستانی خوێن بووین ، نە ئەو تەخشان و پەخشانەی ئێستاش كە وا بڕوات كەشتییەكەمان  لەبەر قورسی و داڕزاوی كون كون و ئینجا نوقوم دەبێت. سەنگینی و میانڕەوی دروستترە لە پەرگیری و لەرێ لادان و قەدبڕی.
خیر اڵامور أوسگها
(6)
پرسیاری هەرە جەوهەری ئەوەیە ئایا حزب بەگوێرەی ویستی زاتی و ئارەزووی شەخسیی هەیكەلە و هەرەمی كاركردنی دادەرێژێت یان بە گوێرەی پێویستی كار و نیەتی بەشداریكردن لە نوێنەرایەتی مەسەلەی گشتی نەتەوە و نیشتمان و پرۆژەی بیناكردنی دیموكراسییەكی پایەداردا؟ 
ویست راستترە، یان پێویستی ئەركەكانی سەرشان؟ 
یەكەمیان مەعلومە گەلەكۆمەیە و دووەمیان حزبی خاوەن مەسەلەیە
(7)
هەموو ئاستەكانی گفتوگۆ و پێشنیاز لەسەر دوارۆژی حزب رەوا و دیموكراسیی و جێگەی رێزە.
گرنگە بەرەی داخوازی كۆنگرە فراوانتر بكرێت ، بەڵام ئەسڵی گرفتەكەمان لە بیر نەچێت: مەبدەئی مافی كۆنگرە و كات و رێوشوێنی بەستنی.
جا وەك لە ئەدەبدا هاتووە  (نالی)  بێت یان ( ناڵی ) گرنگ حەبیبەی شارەزوورە كە : حزبی مافی چارەنووسە.
(8)
یادی دەساڵەی گۆڕان كە دوێنێ بوو لە خزمانی گۆران پیرۆز. 
 رۆژی دوای یادەكانی شیرینی خواردن عادەتەن دەرفەتە بۆ هەڵسەنگاندن 
لەگەڵ پانزە ساڵ دوای بزاوتی ( ریفۆرم ) لە ناو یەكێتییەوە ، هەردوولا ئەمرۆی یەكتری پێكەوە و بە جیا چۆن هەڵدەسەنگێنین؟
پرسیارەكە ناخ وروژێنەرە ، بۆیە بە زمانی میدیای ئەمرۆ دەڵێین : خوار 18+ خۆی تێهەڵنەقورتێنێ.
‌‌ زیاتر ...
هونه‌ر ره‌سوڵ ئه‌حمه‌د
کاروان ئەحمەد عبدالرحمن
شادمان مەلا حەسەن
زۆرترین خوێندراو
  • 24 کاتژمێر
  • هەفتە
  • مانگ