بیروڕا
یه‌كڕیزی، پێویستی هه‌موو وه‌رزه‌كان
هونه‌ر ره‌سوڵ ئه‌حمه‌د
ره‌نگه‌ هیچ نه‌ته‌وه‌یه‌ك نه‌بێت له‌ دونیادا ئه‌وه‌نده‌ی كورد باسی یه‌كڕیزی و گرنگی و پێویستی یه‌كده‌نگی بكات، به‌ڵام له‌به‌رامبه‌ریشدا هیچ نه‌ته‌وه‌یه‌ك نییه‌ ئه‌وه‌نده‌ی كورد له‌كاتی ئاساییدا پشت له‌م پێویسته‌ بكات و به‌ته‌نها له‌كاتێكدا كه‌ قه‌یرانه‌كه‌ ده‌گاته‌ لوتكه‌، ئیدی ئه‌م پرسه‌ ده‌كاته‌وه‌ بابه‌تی گه‌رم و بچووك و گه‌وره‌ی ئه‌م نه‌ته‌وه‌یه‌ ‌و داوای ئه‌وه‌ ده‌كات (هه‌مووان له‌سه‌ریه‌ك مێز كۆببنه‌وه‌).
ئاخر نه‌ته‌وه‌یه‌ك كه‌ خۆی له‌هه‌مووان باشتر ده‌زانێت به‌درێژایی مێژوو قوربانی ده‌ستی ناته‌باییه‌ و ترازان به‌شێكی گرنگی سه‌رتاپای مێژووه‌كه‌یه‌تی، بۆچی له‌و كاته‌دا كه‌ له‌هه‌نگاوه‌كانی به‌ره‌و گه‌یشتن به‌مافێك نزیك ده‌بێته‌وه‌، پرسی یه‌كڕیزی ناكاته‌ واقیع و كاری له‌سه‌ر ناكات؟ بۆ ده‌بێت به‌شێكی گرنگی چاره‌نووسی ئه‌م نه‌ته‌وه‌یه‌ ته‌نها ئه‌وه‌بێت، كاتێك كاره‌ساتێك رووبه‌ڕووی ده‌بێته‌وه‌، ئیدی بیر له‌وه‌ ده‌كاته‌وه‌ كه‌ ده‌بێت بگه‌ڕێته‌وه‌ بۆ ئه‌و راستییه‌ی، كه‌ به‌ر له‌هه‌ر شتێك كۆده‌نگی ده‌توانێت له‌زۆر گرفت رزگاری بكات.
به‌داخه‌وه‌ ئه‌و كاتانه‌ی كورد له‌ به‌شێكی به‌زۆر دابڕێنراوی نیشتماندا سه‌رگه‌رمی به‌ره‌وپێشچوون و گه‌وره‌بوونی قه‌واره‌كه‌یه‌تی، له‌هه‌ركات زیاتر له‌لایه‌ن هه‌ندێك لایه‌نی سیاسی و له‌به‌شێكی تری نیشتمانه‌وه‌ گرفتی بۆ دروست ده‌كرێت و سه‌ركۆنه‌ ده‌كرێت ، تا ئاستی ئه‌وه‌ی كه‌ ئاماده‌ن له‌پێناوی خامۆشكردنی چرای سه‌ركه‌وتن ده‌ست له‌گه‌ڵ دوژمن ونه‌یاره‌ له‌مێژینه‌كانی كوردیش تێكه‌ڵاو بكه‌ن.
له‌ ئێواره‌ی چوارشه‌ممه‌ی رابردووه‌وه‌ به‌شێكی هه‌ره‌ زۆری په‌یامه‌كان، به‌ته‌نها دووباره‌كردنه‌وه‌ی گرنگی و پێوستی یه‌كڕیزییه‌، به‌ڵام كه‌مترینی ئه‌وانه‌ی ئێستا داوای هه‌ڵوێست و یه‌كده‌نگی ده‌كه‌ن، له‌كاتی ئاساییدا (كه‌ هێشتا قه‌یران به‌رده‌رگای پێ نه‌گرتووین) ئه‌و پێویستی و گرنگی یه‌كڕیزییه‌ به‌پێویست نازانن و كاری جددی له‌پێناویدا ناكه‌ن.
یه‌كڕیزی له‌دیدی نه‌ته‌وه‌یه‌كه‌وه‌ كه‌ كه‌مترین كات له‌لایه‌ن زلهێزه‌كانی دونیاوه‌ زیانی پێگه‌یشتووه‌و بووه‌ به‌قوربانی به‌رژوه‌ندییه‌كانیان، ئاساییه‌ بابه‌تێكی نامۆ و ناپێویست سه‌یر بكرێت، به‌ڵام بۆ گه‌لێك كه‌ دابه‌شكراوه‌ و داگیركراوه‌ و له‌چه‌ندین وێستگه‌ی گرنگی مێژووشدا خیانه‌تی لێكراوه‌ و دۆسته‌كانی پشتیان لێكردووه‌، پرسی یه‌كڕیزی نابێت ته‌نها له‌قه‌یراندا ببێته‌ ئه‌وله‌ویه‌ت لای، ئه‌م یه‌كڕیزییه‌ی كه‌ ئێمه‌ له‌كاتی ته‌نگانه‌دا بیرمان ده‌كه‌وێته‌وه‌، تاوه‌كو نه‌بێت به‌ستراتیژ و نه‌كرێت به‌به‌شێك له‌ئه‌وله‌ویه‌ت و كاری له‌پێشینه‌، هه‌رگیز ناتوانین هه‌نگاوی گرنگ و پێویست بنێین، ئێمه‌ نه‌ته‌وه‌یه‌كی ترازاو ‌و لێكدابڕێنراوین، بۆیه‌ له‌هه‌ر كاتێكیشدا له‌هه‌ر به‌شێكی نیشتمان كورد یه‌ك هه‌نگاو بچێته‌ پێشه‌وه‌، چونكه‌ ناو ماڵه‌كه‌ی كۆك و ته‌با نییه‌ و له‌ناوخۆدا یه‌كده‌نگ و یه‌ك وتار نابینرێت، بێگومان به‌بچووكترین كاردانه‌وه‌ی نه‌یاره‌كانی سه‌رتاپای بیناكه‌ی سه‌ره‌وژێر ده‌بێت و ده‌ستكه‌وته‌كانی له‌لێواری ترازانی هه‌میشه‌یی نزیك ده‌بێته‌وه‌.
ئه‌وه‌ی كه‌ ئێمه‌ یه‌كڕیز نین، ئه‌گه‌ر به‌شێكی سروشتی ئێمه‌ بێت وه‌ك كورد، كه‌ مێژوو ئه‌و راستییه‌ ده‌سه‌لمێنێت، له‌هه‌مان كاتیشدا به‌شێكی تری نه‌هامه‌تییه‌كانی ئێمه‌ ئه‌وه‌یه‌ به‌تایبه‌ت له‌م كاته‌دا، كه‌ له‌بۆشایی سه‌ركرده‌یه‌كی كاریزمیداین، كه‌سێك نییه‌ هه‌مووان وه‌ك یه‌ك ببینێت و مه‌ترسییه‌كان بخوێنێته‌وه‌ و ئه‌گه‌ر و پێشهاته‌كان شه‌ن و كه‌و بكات، هه‌ر ئه‌مه‌ش هۆكاری سه‌ره‌كییه‌ كاتێك بڕیار ده‌درێت هه‌مووان له‌سه‌ر یه‌ك مێزی گفتوگۆ كۆببنه‌وه‌، به‌رژه‌وه‌ندی تاكه‌ كه‌سی و پیرۆزكردنی ئه‌م و ئه‌و، ئه‌وه‌نده‌ زاڵ ده‌بێت ئیدی به‌ر له‌هاتنه‌ ژووره‌وه‌ بۆ سه‌ر مێزی یه‌كڕیزی، هه‌موو هه‌نگاوه‌كان په‌كده‌خرێن و ئه‌و پێویستییه‌شی هه‌مووان داوای ده‌كه‌ن به‌ته‌نها له‌چوارچێوه‌ی دروشم و خه‌ونی ئه‌رخه‌وانیدا ده‌مێنێته‌وه‌.
له‌ڕاستیدا له‌پاڵ ئه‌و راستییه‌شی كه‌ له‌م قۆناغه‌دا سه‌ركرده‌یه‌كی كاریزمی نییه‌ بۆ یه‌كخستنی هه‌ڵوێستی هه‌مووان، له‌هه‌مان كاتیشدا ره‌نگه‌ یه‌كێكی تر له‌گرفته‌ سه‌ره‌كییه‌كانی كورد ئه‌وه‌ بێت كه‌ كه‌مترین كات له‌گه‌ڵ دۆسته‌كانیدا به‌نووسراوی ره‌سمیی له‌سه‌ر بنه‌مای دواتر (ده‌ستكه‌وته‌كانم چی ده‌بێت؟) مامه‌ڵه‌ی نه‌كردووه‌، به‌كورتییه‌كه‌ی ئێمه‌ نه‌ته‌وه‌یه‌كی كورتبین و ناواقعین ‌و هه‌رگیز له‌سه‌ر بنه‌مای دونیابینی و روئیای جیاواز سه‌یری رووداوه‌كانمان نه‌كردووه‌، ئاخر نه‌ته‌وه‌یه‌ك به‌هه‌موو هێزیه‌وه‌ شه‌ڕی گه‌وره‌ترین دووژمنی مرۆڤایه‌تی كردبێت و له‌ڕابردووشدا قوربانی ده‌یان پیلانگێڕی جۆراوجۆر بووبێت، چۆن ده‌بێت هه‌روا به‌و ئاسانییه‌ له‌گه‌ڵ دۆسته‌كانیدا مامه‌ڵه‌ بكات، كه‌ ته‌نها تویتێك له‌تیوته‌ره‌وه‌ سه‌رتاپای ئه‌زموونه‌كه‌ی بخاته‌ژێر مه‌ترسی و داڕووخانی یه‌كجاره‌ی ببێته‌ یه‌كێ له‌نزیكترین ئه‌گه‌ره‌كانی به‌رده‌می.
‌‌ زیاتر ...
شه‌هریه‌ احمد
ئاری عومه‌ر
ئازاد ئیبراهیم ئەحمەد
زۆرترین خوێندراو
  • 24 کاتژمێر
  • هەفتە
  • مانگ