بیروڕا
كۆنگرە دەبێ‌ ئەم واقیعە تەڵاق بدات!!
ئەرسەلان مەحمود

    كۆنفڕانسە ئۆرگانیكییەكانی یەكێتیی، بەرەو چوارەم گۆنگرەی خۆی، بەڕەغمی دەیان سەرنج و تێبینییەوە، سەركەوتووانەو سەرئەنجام كۆتاییان هات، ئەوەی ماوە ئەنجامدانی كۆنگرەو، چاوەڕوانی یەكە پێكهێنەرە حزبی و جەماوەرییەكەی ئەم حزبەیە لەسەر هەڵوێست و ئەداو هاتنەوە سەرهەست لەیەكبەیەكی ئەندامانی كۆنگرەدا.

    ئیتر، واجبە هەرە گەورە حزبییەكە ئەوەیە: سەختەوەری ئەم پەرت و پەرێشانی و منە منكارییە ئەگەر زەمان و زەمینەو قودرەتی ڕیشەكش کردنیشی لەهۆڵی كۆنگرەدا نەبێت، دەبێت كۆنگرە وابكا كاڵبكرێتەوەو، لەجێگەیدا، یەكێتییایەتی و یەكێتیی بكرێنەوە بەجێگرەوە، ئەمە راسپاردە هەرە بەهێزەكەی هەڤاڵ" مام جەلال"و، دەیان هەزار شەهیدو، تەواوی یەكێتییەكانە، بێگومان ئەگەر دەویسترێت یەكێتییەكی بەهێز بهێندرێتە دەرەوەی كۆنگرە!

   كۆنگرە، تەما گەلێكی زۆر مەزن و بەهێزی یەكێتییەكانی لەسەر هەڵچندراوەو پێدراوە، دەبێت گۆڕانكاری بنەڕەتی لەژیانی حزبیدا بهێنێتە ئاراوە، گۆڕانكارییەك لەڕوخسارو شكڵەوە تا ناوەرۆك و کڕۆک لەكارو ئەداو پڕاكتیزە كردندا، هەر ئەوەش نا، بەڵكە دەبێت ڕێنامەی تایبەت بەبونیادنانەوەی پێگەی كوردو یەكخستنەوەی توانستە كوردستانییەكان و بەرەو پێشبردنی كوردستان بەكەڵك وەرگرتن لەڕەخنەو سەرنجدان و موعاناتی خەڵك گەڵاڵە بكرێت، لەسەروی هەموو ئەمانەیشەوە مەسەلەی پەروەردەو زیندو كردنەوەی فكرو بەشداریپێكردنی ژنان و زەمینە سازی تایبەت بەهاتنە پێشەوەی گەنجان زۆر جیددی و حەددیانە هەڵوەستەی لەسەر بكرێت و، بكرێتە بڕیار، بەبێ‌ دەستەبەری ئەم حەقیقەتانە، كۆنگرە لەبری كۆنگرەی بوژێنەرەوەو، نوێكردنەوەی یەكێتیی، دەبێت بەكۆنگرەی خۆد كوژی یەكێتیی لەخۆیدا!!

  راستە دواجار خودی كۆنگرەش ئەبەدی و كۆتایی ڕێگەو كۆتایی دنیا نیە، بەڵام ئەم سەردەم و دەرفەت و دەرەتانەیش تێدەپەڕێ‌، ئیتر نابێت ئەوەی هەیە بدرێتە دەست قەدەر یەكلایی بكاتەوە، كۆنگرە دەبێت بڕیار بدات، ئەم بێسەروبیەرییە لەژیانی یەكێتیی دا، دەبێت لەڕەگ و ڕیشاڵەوە ڕیشە كێش بكات، پرۆسەی سیاسی بەردەوامەو لەسەر یەكێتیی ناوەستێت، تا ئێرە لەسەر خاتری هەڤاڵ "مام جەلال" و خوێنی شەهیدان، جەماوەر دەستی لەپشت و پەنایی ئەم حزبە هەڵنەگرتووەو نەكردوەتەوە، دوای كۆنگرە ئەم چانسە نامێنێت، ئەم جەماوەرە دڵسۆزە چیتر ڕێگە نادات لەژێر هەیمەنەو شكۆو سێبەرو ئەم سایە بەخوێن بونیادنراوەدا، جگە لەیەكێتییایەتی، بێپەرواو هەروا بێباكانە خەریكی كاری تربن!!

   كۆنگرە، ئەگەر نێوانی میزاج و سیاسەت، ئەگەر بزنس و سیاسەت، ئەگەر سیاسەت و ڕۆمانسیەت تەڵاق نەدات، كۆنگرە ئەگەر نێوانی مارەیی بەمیرات بەشینەوەی پۆست و پلەو پێگە كارگێڕی و حزبییەكان، دانەبڕێ‌ و هەڵنەوەشێنێتەوە، ئەگەر لەجێگەیاندا بەحزبی و بەمانایان نەكاتەوە، نەیتوانیووە یەكێتیی بداتەوە دەست خۆی، نەیتوانیووە سەركەوتوو بێت.

   دیارە نەك هەر یار، ڕەنگە نەیاریش ئەمەی نەوێت، چونكە هێشتا هەم خەڵك، هەم ئازادی و ئازادییەکان، هەم دیمۆكراسیەت و گەشەكردنی پرۆسەی سیاسیش لەهەر كات زیاتر پێویستیان بەیەكێتیی و كاریگەرییەكانی ئەم حزبە هەیە.
‌‌ زیاتر ...
حاكم قادرحه‌مه‌جان
شاڵاو ئەحمەد
ئاڵا ئەحمەد
ئازاد ئیبراهیم ئەحمەد
شه‌هریه‌ احمد
زۆرترین خوێندراو
  • 24 کاتژمێر
  • هەفتە
  • مانگ