بیروڕا
کەرکوک و یەکێتی؛ هاوپەیمانی تاکو هەڵبژاردنی ئەنجومەنی پارێزگا
ئازاد ئیبراهیم ئەحمەد

هەر حیزبێکی سیاسی کوردی خۆی بەخاوەن کەرکوک بزانێت، ئەوا دەبێت زیاتریش قوربانی بەو پرسە بدات چ بەڕێگای ئاشکراو خێر بێت، یان چ بە ڕێگای نهێنی و شاراوەش بێت.

یەکێتیی نیشتمانیی کوردستان، هەمیشە و لەچوار دەیە و نیوی زیاتری تەمەنیدا کەرکوکی بەبڕبڕەی پشتی پرسی کورد زانیووەو لەساڵانی 1983 و 1984دا ئەگەر پرسی کەرکوک نەبوایە، سەدام حسێنی فاشیستی ڕووخاو، زۆر زیاتری لەم حکومەت و شێوە دەسەڵاتەی دەدا بەکورد ئەمڕۆ لەباشووری کوردستان هەیەو بەخوێنی هەزاران ڕۆڵەی کورد و یەکێتی هاتۆتە دی، بۆیە ئەم حیزبە بەبەراورد بەهەموو هێزە سیاسییەکانی دیکەی کورد زیاتر خێر و شەڕی کەرکوکی لەسەرە.

هیچ بیانوویەک بۆ هەر هێز و لایەنێکی سیاسی لەکوردستان نەماوە ئەگەر یەکێتیی نیشتمانیی کوردستان هاوپەیمانی لەگەڵ ڕەتکردبێتەوە لەناوچەکانی دەرەوەی هەرێم و کەرکوک بۆ ئەنجومەنی نوێنەرانی عێراق، چونکە یەکێتی لەپێناو کەرکوک ڕێگای یەکەمی ڕێککەوتن و هاوپەیمانی لەگەڵ پارتی دیموکراتی کوردستان تاقیکردەوە و پارتی ڕاستگۆ نەبوو لەگەڵ یەکێتی، ئەمەش کاتێک بوو کە پێکهێنانی کابینەی نۆ و ئیمزاکردنی 45 کورسی پەرلەمانی پارتی لەلایەن یەکێتییەوە بۆ ئەوەبوو کە نوێنەرانی پارتی لەئەنجومەنی پارێزگای کەرکوک بچنەوە کەرکوک و پێکەوە پارێزگارێکی کورد بۆ شارەکە دابنێن.

ئەوەندەی بەندە ئاگادارم، ئەگەر لەپێناو کەرکوک نەبوایە، یەکێتی 45 کورسی پارتی ئیمزا نەدەکردو دەبوا کوردستان بچێتەوە هەڵبژاردنێکی دیکەوە، چونکە یەکێتی پێیوابوو 10 کورسی پارتی تەزویرکراوە. لێرەدا دەتوانم بڵێم ئەم یاریەی پارتی لەگەڵ یەکێتی کردی شکست نەبوو بۆ یەکێتی بەڵکو قوربانیدانێکی دیکەی یەکێتی بوو لەپێناو کەرکوک و دوورنەخستنەوەی کەرکوک لە یەکێتی و کورد، هەوڵە شکستخواردووەکەی ڕیفراندۆمیش هەمان ویست لەپشتی بوو چۆن کەرکوک و یەکێتی لەیەکتر دووربخرێنەوە و ئەو خەونە مایەپووچ بوو.

ئێستا ڕێگای دووەم لەپێش یەکێتی و هاوسەرۆکەکانێتی و هەنگاویشی بۆ نراوە!، ئەویش هاوپەیمانی (یەکێتی + گۆڕان، یەکێتی + یەکگرتوو + کۆمەڵ)ە کە درێژبکرێتەوە لە هەڵبژاردنی ئەنجومەنی نوێنەرانی عێراقەوە بۆ ئەنجومەنی پارێزگای کەرکوک، ئەم ڕێگایەیان زۆر گونجاوتر و پێویستترە بۆ یەکێتی، چونکە هەم هەوڵەکانی یەکێتی پێش دەخەن بۆ وەرگرتنەوەی پارێزگارێکی کورد لەو شارە لەکاتی هەڵبژاردنی ئەنجومەنی پارێزگاکەدا، هەم یەکێتیش دەتوانێت ئەو هەموو پۆست و کورسییەی پێشتر دابووی بە پارتی لەکەرکوک، بەنیوەی ئەوە لایەنە هاوپەیمانەکانی ڕازی بکات و فۆرمێکی نوێ لەخەبات لەپێناو کەرکوک دەست پێبکات.

کاری ئایندەی یەکێتی ئەوەیە؛ هاوپەیمانێتی لەگەڵ گۆڕان و کۆمەڵ و یەکگرتوو لەنوێنەرانی عێراقەوە درێژبکاتەوە بۆ ئەنجومەنی پارێزگای کەرکوک، چونکە بۆ یەکێتی هاوپەیمانێتییەک دڵنیایی جێبەجێکردنی هەبێت بە کورسییەک کەمترەوە باشترە لەهاوپەیمانی پارتی بەکورسییەک زیاترەو هەمیشەش ترسی ئەوە هەبێت پارتی ڕێککەوتن و هاوپەیمانێتییەکان جێبەجێ ناکات.
‌‌ زیاتر ...
ئازاد ئیبراهیم ئەحمەد
نیاز سەعید عەلی
تەحسین تەها چۆمانی
ئازاد ئیبراهیم ئەحمەد
نه‌سرین كورده‌
ئازاد ئیبراهیم ئەحمەد
ئازاد ئیبراهیم ئەحمەد
ئازاد ئیبراهیم ئەحمەد
زۆرترین خوێندراو
  • 24 کاتژمێر
  • هەفتە
  • مانگ