بیروڕا
لە ڕۆژژمێری (پارتیزان)ەكاندا
د.ئه‌رسه‌لان بایز
*خۆزگەم بەو سەگە
لە زستانی ساڵی (1989) دوای ئەنفالە بەدناوەكەو كشانەوەی هێزەكانی پێشمەرگە بۆ سەر سنورەكانی كوردستانی ڕۆژهەڵات. جار جارە یەكە چەكدارەكانی پێشمەرگە بە (پارتیزانی) دەگەڕانەوە ناوچەكان.
یەكێ لە جارەكان (ئازاد مستەفا، فەخرەدین مەلا كەریم) بە نهێنی دەگەڕێنەوە چیای (قەرەچوغ)ی نێوان دەشتی كەندێناواو قەزای مەخمور. چەند شەوێك لەیەكێ لە ئەشكەوتەكانی چیاكە خۆیان حەشار دەدەن. بێ ئاو، بێ نان. بێ جلوبەرگ، پێڵاوێكی شڕی كۆن لە پێ، شەوان لەسەرمانا جوقەی ددانیان دەهات. (پند) دم و چاوی خواردبون و سوڕ هەڵگەڕابوون.
لە دوورەوە حەپەی سەگێك دەبیستن. (ئازاد-ئازۆ مەخموری) ڕوو لە (فەخرەدین) دەكات‌و دەڵێ: (فەخە)…! خۆزگەم بەو سەگە… هەر هیچ نەبێ ترسی لەسەر نیەو بە ئارەزووی خۆی بەملاو ئەولادا دەڕوات، دڵنیام تێرەو سەرمای نیە.
*خەوتن لەگەڵ (مار)
(فەتاح كەریم پیرە) گێڕایەوە: هاوینی ساڵی (1989) لەگەڵ دوو پێشمەرگەی تری پارتیزانی، لە یەكێ لە (كۆندەڕ)ی زورگەكانی دێدەوان خۆمان حەشاردابوو. چاوەڕوانی ئاوابوونی خۆرمان دەكرد تاكو بەرەو گوندەكانی رۆژهەڵاتی هەولێر بچینە خوارەوە. منیش تاخم و تفەنگەكەم كردبووە سەرین و ڕاكشابووم. هەردوو برادەرەكەم لە پڕ بە توندی بانگیان كردم و خۆیان فڕێدایە خوارەوە، منیش وامزانی ئاشكرابووین بۆیە دەستم دایە كڵاشنكۆفەكەم و وەكو ئەوان خۆم فڕێدایە خوارەوەو ئامادەی شەڕو بەرەنگاربوونەوەم وەرگرت. هەستم ڕاگرت هیچ دەنگ و جوڵەیەكی هێزەكانی دوژمن لە دەوروبەرو نزیكماندا نەبوو. ئەوانیش وەكو من نەكەوتبوونە باری ئامادەكاری شەڕ. بۆیە بەحەپەسانەوە لێم پرسین چی بووە…؟ من هەست بە هیچ ناكەم.. وتیان:
-بڕۆوە كۆندەڕەكەو سەیری تاخمەكەت بكە.
كاتێ چووم مارێكی ڕەشبەڵەكی زیاتر لە مەترێك لە تەنیشت سەری من لەسەر تاخمەكەم (كەپكە)ی كردبوو، دیارە پێشتر لەگەڵ من خەوتبوو، بەڵام سەیر لەوەدابوو چۆن پێوەی نەدابووم.
منیش مارەكەم دەركردو تاخمەكەم لە خۆم بەستایەوەو ئەوێمان جێهێشت.
*هەناسەم لێبڕا
(شەریف حەسەن) گێڕایەوە: من و دوو پێشمەرگەی تری پارتیزان لەناو كێڵگەیەكی گەنم لە بناری زورگەكانی (گۆمەسپان) خۆمان حەشاردابوو. سێ پارتیزانی تریش لەناو مێرگێكی نزیك ئێمەدا بوون. چاوەڕوانی دەرفەتێكمان دەكرد بۆ چوونە خوارەوە بۆ گوندەكانی دەشتی هەولێر، من پێڵاوەكانم كردبووە سەرین و راكشابووم. لەپڕ هەستم بە جوڵەیەكی نائاسایی لە (بەلەك)ی (پوز) ڕاستم كرد. كاتێ سەرم بەرزكردەوە (مار)ێكم بینی كە بەشی زۆری چوو بووە دەلینگی شەڕواڵەكەم و هەر تەنیا كلكی بە دەرەوە مابۆوە. لە شوێنی خۆم جام بووم، هەناسەم لێبڕابوو گیانم هاتبووە لووتم و چاوەڕوانی مەرگی خۆم دەكرد. بۆیە بێ ئیرادەو دەستە وەستان خۆم دایە دەستی قەدەرو خواو مارەكە. مارەكە بێ هیچ وەستان و گرفتێك لە دەلینگی قاچی چەپی شەڕواڵەكەم هاتە دەرەوەو رۆیشت. منیش لە چاكەو (پیاوەتی) و بێ زیانی ئەو هیچم نەكردو بەڕێزەوە بەڕێم كردو ماڵئاواییم لێكرد.
‌‌ زیاتر ...
فه‌رید ئه‌سه‌سه‌رد
نەوزادی موهەندیس
د.ئه‌رسه‌لان بایز
فه‌رید ئه‌سه‌سه‌رد
ئازاد ئیبراهیم ئەحمەد
ئازاد ئیبراهیم ئەحمەد
زۆرترین خوێندراو
  • 24 کاتژمێر
  • هەفتە
  • مانگ