دۆسیە
ئایا ڕیفراندۆم شكستی هێنا ؟
 ئاراسته‌:عه‌بدول نه‌جم

ئەنجامدانی ریفراندۆمی سەربەخۆیی لە رۆژی 25ی ئەیلولی 2017، لە دوای دوو ساڵ كه‌ تا ئێستاش هەرێمی كوردستان قوربانی ئەو بڕیارە دەداتەوە.
چۆن باس له‌ ڕۆژی ڕیفراندۆم ده‌كرێت؟ ئایا ڕیفراندۆم كاره‌سات بوو یان شكستی هێناوه‌  بۆچونه‌كان له‌باره‌یه‌وه‌ باس له‌ چی ده‌كه‌ن.


ڕیفراندۆم کێشەی کوردی سەد ساڵ هێنایە دواوە

بەهار مەحمود پەرلەمانتاری گۆران لە پەرلەمانی عێراق رایگەیاندوه‌،پێش ئەوەی ڕیفراندۆم ئەنجامبردێت من دەرەنجامە خراپەکانیم درک پێکردبوو، هەروەها ڕیفراندۆم بەکارەسات ناودەبات و دەڵێت،  ڕیفراندۆم کێشەی کوردی سەد ساڵ هێنایە دواوە.
لەنوسینێکدا لە هەژماری خۆی لە فەیس بووک بەهار مەحمود ڕایگەیاندوە، زۆر شانازی دەکەم کە پێش ئەنجامدانی ڕیفراندۆمە شومەکە هەموو ئاکامەکان و دەرئەنجامەکانیم وەک ئەوەی ڕوویدا درک پێ کردبوو وە هەوڵمدا لەڕێگەی ئەنجامدانی چەندین سیمینارو نووسین و چاوپێکەوتنی میدیایی ئەو بۆچوونەم بگەیەنمە زۆرترین هاووڵاتیان.نوسیویەتی، ، لە دڵەوە پێم خۆش بوو من هەڵە بم و بۆچوونەکانم ڕاست دەرنەچن ، بەڵام بەداخەوە هەمووی ڕاست دەرچوو وە کێشەی کورد لە عێراقدا سەد ساڵ هاتە دواوە. بەهار مەحمود ڕیفراندۆم بە کارەسات ناودەبات و دەڵێت، " یادی چی دەکەنەوە ؟!!!! ئەوە کارەسات بوو.


كاریگەریه‌كانی  ریفراندۆم چه‌ بون

دوای دوو ساڵ ئێٍستاش لێكەوتەكانی ریفراندۆم بە سەر رەوشی هەرێمی كوردستانەوە ماوە، هەرچەندە بارزانی بە شێوازێكی بەپەلە لە سەرۆكایەتی هەرێم هاتە خوارەوە، بەو بڕیارە هەرچەندە 51%ی خاكی هەرێم لەدەستدرا و بەڵام زیانەكان لەوێدا كۆتایی نەهات هەرێمی كوردستان بچوككرایەوە و شكۆی سیاسی و دیبلۆماسی شكێندرا. 
هەرێمی كوردستان وەك ناوچەیەكی بچوك مامەڵەی لەگەڵ دەكرێت لە رووی ئابوری و سیاسی و دیبلۆماسیەوە تا ئێستاش نەیتوانیوە بێتەوە سەرپێی خۆی، بە رادەیەك بەهۆی ئەو ریفراندۆمەی بارزانیەوە هێزە سیاسیەكان زیاتر لێك دوور كەوتنەوە كێشەكانی ناو پارتی بۆخۆشی زۆرتر بەدیار كەوتن بەڕادەیەك نێچیرڤان بارزانی لە رێگەی میدیا سێبەرەكانی سەر بە باڵەكەی بەرامبەریانەوە بە هۆی پڕۆژەی ئابوری سەربەخۆوە تۆمەتبار دەكرا بە شكستەكانی هەرێم، بە پێچەوانەشەوە مەسعود بارزانی تۆمەتبار دەكرا بە هەوڵی بۆ مانەوەی لە كورسیەكەی خۆیدا.


ڕیفراندۆمی سەربەخۆیی کوردستان سەرکەوتنی بەدەست هێنا

نووسەر و ڕۆژنامەنووسێک ڕای گەیاند، ڕیفراندۆمی سەربەخۆیی کوردستان سەرکەوتنی بەدەست هێنا و ئەو دۆکیۆمێنتە بەدەستهات کە کورد چی دەوێت. باسیشی لە دۆخی ئێستای ئەوانە دەکات کە دژی ڕیفراندۆم بوون.
ڕامیار مەحموود، نووسەر و ڕۆژنامەنووس لە پێگەی تایبەتیی خۆی لە تۆڕی کۆمەڵایەتیی (فەیسبووک)، نووسینێکی کورتی بەناونیشانی (ڕیفراندۆم شکستی هێنا؟) بڵاو کردەوە کە تێیدا رای  گەیاندووە، ئەگەر ڕیفراندۆم شکستی هێنابێت، ئەوە واتای ئەوەیە کە ئەنجام نەدراوە، بەڵام کاتێک کە ئەنجام دراوە، واتا سەرکەوتووە و ”ئەو دیکۆمێنتە بە دەستهات کە کورد چی دەوێت و ئامانجی کۆتایی چییە؟.


ئەگەر پرۆژەکە شکست خواردووە، چۆن  پارتی بووە خاوەنی 45 کورسیی

ڕوونیشی کردووەتەوە، ئەگەرچی کاردانەوە و سزادانی ریفراندۆم قورس بوو و کوردستان کەوتە بەردەمی ئەگەری پێچانەوەی کۆی ئەزموونەکەی، بەڵام بە بڕیارێکی ناوازە، ئەمریکا هەرێمی کوردستانی وەک هێزی سوور دەستنیشان کرد و بەرەبەرە بووژانەوەی سیاسی و دپلۆماسی پایتەختی هەرێمی گەرم کردەوە.
ڕامیار مەحموود دەڵێت: ”تەنانەت پارتی کە حزبێک بوو بە ڕاستەوخۆ چووە ناو پڕۆژەی ڕیفراندۆمەوە، ئەگەر پرۆژەکە شکست خواردووە، چۆن بووە خاوەنی 45 کورسیی پەرلەمانی کوردستان؟ بگرە بوو بە بەهێزترین پارتی سیاسی، هەم مەرجەعی سیاسی خۆیانن، هەم سەرۆکی هەرێم، هەم سەرۆکی حکوومەت و هەم هاوپەیمانی زۆر گەورەترین حزبی ناوچەی سەوز لەگەڵیانە.


داواده‌كرێت ڕۆژی ڕیفراندۆم بکرێت بە ڕۆژی نیشتیمانی

جێگه‌ی باسه‌ ئەمرۆ25ی ئه‌یلول  پەرلەمانی کوردستان کۆبوەوە، و تەوەری یەکەمی کۆبونەوەکە تایبەت بوو بە دووەمین ساڵیادی ڕیفراندۆم ، و بەوبۆنەیەوە سەرۆکی پەرلەمان وتارێکی خوێندەوە، هەر لەکۆبونەوەکەدا  و لەتەوەری یەکەمدا فراکسیۆنی پارتی داوایان لە سەرۆکایەتی پەرلەمانی کوردستان کرد، کە ڕۆژی ٢٥ی ئەیلولی هەموو ساڵێک کە هاوکاتە لەگەڵ ڕۆژی ئەنجامدانی ڕیفراندۆندا بکرێت بە ڕۆژی نیشتیمانی خەڵکی کوردستان.
1219 جار خوێندراوه‌ته‌وه‌
9/25/2019 3:02:16 PM
زیاتر ...
زۆرترین خوێندراو
  • 24 کاتژمێر
  • هەفتە
  • مانگ